10:11 PM
Unknown
ദമ്മാം: ചരിത്രത്തില് ഒരു സാമുദായിക രാഷ്ട്രീയക്കാരനായി ഒതുക്കിനിര്ത്തേണ്ട കേവല നേതാവ് മാത്രമല്ല സി.എച്ച് മുഹമ്മദ് കോയയെന്നും കൈവെച്ച മേഖലകളിലൊക്കെയും ഒരു സാമൂഹിക പരിഷ്കര്ത്താവിന്റെ റോള് മോഡലായി വരുംതലമുറക്ക് ചൂണ്ടിക്കാണിക്കാനാകുന്ന അപൂര്വ വ്യക്തികളില് ഒരാളായി ഇന്നും ജീവിക്കുകയാണ് അദ്ദേഹമെന്നും കെ.എം.സി.സി സംഘടിപ്പിച്ച സി.എച്ച് അനുസ്മരണ സംഗമം അഭിപ്രായപ്പെട്ടു.
കേരള രാഷ്ട്രീയത്തിലെ മുടിചൂടാമന്നനായി വാഴുമ്പോഴും അധികാരത്തിന്റെ സോപാനങ്ങള് കീഴടക്കുമ്പോഴും മത ജാതീയ സങ്കുചിത ചിന്തകള്ക്കതീതമായി അതിരുകളില്ലാത്ത മാനവികത ഉയര്ത്തിപ്പിടിച്ചുകൊണ്ടായിരുന്നു സി.എച്ചിന്റെ പ്രയാണം.
അതേസമയം അടിച്ചമര്ത്തപ്പെട്ടവന്റെ അവകാശ സംരക്ഷണ രംഗത്ത് അധികാരത്തിന്റെ കാര്ക്കശ്യം ഉപയോഗപ്പെടുത്താനും അദ്ദേഹം ആരെയും ഭയപ്പെട്ടില്ല. നിസ്വാര്ഥമായ ആ നീക്കങ്ങളുടെ ഗുണഫലമാണ് വര്ത്തമാന കേരളം ഇന്നനുഭാവിക്കുന്നതെന്ന് സംഗമം അനുസ്മരിച്ചു.
ദമ്മാം സെന്ട്രല് കമ്മിറ്റിയുടെ ആഭിമുഖ്യത്തില് സഫ ഓഡിറ്റോറിയത്തില് സംഘടിപ്പിച്ച പരിപാടിയില് ചെയര്മാന് കബീര് കൊണ്ടോട്ടി അധ്യക്ഷത വഹിച്ചു.
കിഴക്കന് പ്രവിശ്യ പ്രസിഡണ്ട് ഖാദര് ചെങ്കള ഉദ്ഘാടനം ചെയ്തു. നാഷണല് കമ്മിറ്റി ട്രഷറര് സി ഹാശിം, സി.എച്ച് മൗലവി, എഴുത്തുകാരന് മന്സൂര് പള്ളൂര്, ഇസ്മായില് വള്ളിയോത്ത് പ്രസംഗിച്ചു. നാസര് അണ്ടോണ അനുസ്മരണ ഗാനമാലപിച്ചു.
കോഴിക്കോട് സി.എച്ച് സെന്ററിലേക്ക് ദമ്മാം ചാപ്റ്റര് സ്വരൂപിച്ച മൂന്നു ലക്ഷം രൂപയുടെ ഫണ്ട് അബ്ദുറഹ്മാന് മലയമ്മയില്നിന്ന് ഖാദര് ചെങ്കള ഏറ്റുവാങ്ങി. കണ്വീനര്മാരായ അമീറലി തളിപ്പറമ്പ് സ്വാഗതവും സക്കീര് അഹമ്മദ് നന്ദിയും പറഞ്ഞു. അനസ് മൗലവി ഖിറാഅത്ത് നടത്തി.
News @ Chandrika
9/22/2013 4:24:02 PM
Posted in: സി.എച്ച് അനുസ്മരണം ദമാം
